रौतहट । चैत २०। आन्तरिक विवादका कारण लथालिङ्ग रहेकाे रौतहट उद्योग वाणिज्य संघकाे साधारण सभा हालको लागि स्थगित गरिएको छ।
चैत २३ गते शनिवारका दिन तय गरिएको रौतहट उद्योग वाणिज्य संघकोे विशेष साधारण सभा अदालत प्रक्रियाको कारण हालको लागि स्थगित भएको संघका अध्यक्ष पण्डित प्रसाद जयसवालद्वारा जारी विज्ञप्तिमा उल्लेख गरिएकाे छ ।
प्रेषित विज्ञप्तीमा रौतहट उद्योग वाणिज्य संघका सम्पूर्ण पदाधिकारी एवं कार्यकारी समिति सदस्यलाई समेत विपक्षी बनाएर उच्च अदालत जनकपुरको अस्थायी इजलास वीरगञ्जमा ८१–डब्लु जिरो–०८५१ नम्वरको मुद्दा दायर भएको परिवेशमा विशेष अधिवेशन गराउदा अदालतको मानहानी हुने भएको हुँदा अदालतबाट दायर भएको मुद्दाको किनारा नलागे सम्म अधिवेश स्थगित गर्न समिति बाध्य भएको जनाइएको छ ।
उच्च अदालत जनकपुरको अस्थायी इजलास वीरगञ्जमा दायर मुद्दाको सूचना चैत १७ गते प्राप्त भएपछि रौतहट उद्योग वाणिज्य संघको बसेको वैठकले मुद्दाको अन्तिम टुंगो नलागे सम्म यही चैत २३ गते भनिएको विशेष साधारण सभा एवं अधिवेशन हालको लागि स्थगित गरिएको सबैमा यसै सूचना मार्फत जानकारी गराइएको प्रेषित विज्ञप्तीमा उल्लेख गरिएको हो ।
